Startap asoschilari uchun ajoyib imkoniyat: dunyo boʻylab kelib tushgan koʻplab talablarga binoan, TechCrunch jamoasi Startup Battlefield 200 tanlovi uchun arizalar qabulini 8-iyungacha uzaytirdi. Agar siz oktyabr oyida San-Fransiskodagi Moscone West majmuasida boʻlib oʻtadigan Disrupt Stage sahnasida oʻz loyihangizni taqdim etish imkoniyatini boy berdim deb oʻylagan boʻlsangiz, bu siz uchun soʻnggi imkoniyatdir. Bu haqda Techcrunch.com xabar beradi.
Startup Battlefield 200 — bu hali tanilmagan, ammo ulkan salohiyatga ega startaplar uchun global maydonga chiqish joyidir. Tanlab olingan asoschilar TechCrunch Disrupt 2026 doirasida nufuzli investorlar, OAV vakillari va global ekotizim qarshisida oʻz gʻoyalarini himoya qiladilar. Gʻolib startap 100 000 dollar miqdoridagi begʻaraz moliyalashtirishga ega boʻladi, biroq har bir ishtirokchi oʻz biznesi traektoriyasini oʻzgartirib yuboradigan darajadagi eʼtiborga sazovor boʻladi.
Ushbu nufuzli tanlovda shu kunga qadar 1 700 dan ortiq startap ishtirok etib, ular jami 32 milliard dollardan ortiq investitsiya jalb qilgan. Dropbox, Discord, Mint, Fitbit va Trello kabi gigantlar aynan shu platforma orqali oʻz yoʻlini boshlagan. Shuningdek, ishtirokchilar orasidan Microsoft, Google, Salesforce, Uber va Amazon kabi kompaniyalar tomonidan sotib olingan 250 dan ortiq muvaffaqiyatli loyihalar chiqqan.
Tashkilotchilar MVP (minimal ishchi mahsulot) bosqichidagi, sanoatni oʻzgartira oladigan jasur startaplarni qidirmoqda. Tanlovda asosan pre-seed va seed bosqichidagi loyihalar ishtirok etishi mumkin, biroq kapital talab qiladigan sohalardagi Series A startaplari ham koʻrib chiqiladi. Minglab arizalar orasidan eng yaxshilari TechCrunch mutaxassislari tomonidan sinchkovlik bilan saralab olinadi.
“Zamin”ni Telegramʻda oʻqing!
