Самарқандда очилган Глобал инвестиция форуми ва кўргазма 18-октабргача давом этади.
Самарқанд шаҳридаги “Экспомарказ”да Бутунжаҳон туризм ташкилоти Бош Ассамблеяси доирасида Глобал инвестиция форуми ва кўргазма иш бошлади.
Инвестиция форумида вазирлар, халқаро молия институтлари раҳбарлари даражасида муҳокамалар, 5 та панел сессияси, 22 та тақдимот ўтказиш режалаштирилган.
“Экспомарказ”даги 4200 кв.м майдонда Ўзбекистоннинг 14 та ҳудудининг туристик-инвестицион салоҳиятини акс эттирувчи стендлар, 3 та туристик-рекреасион зона - Зомин, Чорвоқ, Чимён ҳудудларининг, Марказий Осиё давлатлари - Қозоғистон, Қирғизистон, Тожикистон ва Туркманистоннинг, шунингдек, Япония, Чехия, Франция ва Бразилиянинг 4 та стартап лойиҳасининг ҳамда Ўзбекистон Туризм қўмитаси, “Ўзбекистон темир йўллари” АЖ, “Ўзбекистон аэропортлари” АЖ ва “Узбекистан вертолётлари” МЧЖларининг стендлари ташкил этилган.
Бугунги кунга қадар 100 дан ортиқ давлатдан 634 вакил, шу жумладан, 122 та йирик хорижий инвестор ҳамда 540 га яқин йирик маҳаллий компаниялар Бош Ассамблеянинг расмий веб-сайтидаги махсус ҳавола орқали рўйхатдан ўтиб иштирок этишини маълум қилди.
Форум доирасида умумий қиймати 2 миллиард долларлик истиқболли лойиҳалар манзилли рўйхати шакллантирилиб, инвесторларга тақдим этилди.
