Тошкентда янги трамвай йўналиши қурилиши режалаштирилмоқда

Ўзбекистонда 2025-йил учун Давлат дастури лойиҳаси жамоатчилик муҳокамасига қўйилди. Ушбу дастур жамоат транспортини экологик тоза ёқилғига ўтказиш орқали модернизация қилишни тезлаштиришга қаратилган. Тошкент шаҳрида трамвай йўналишларини кенгайтириш ва аҳоли учун қулайроқ қилиш мақсадида янги трамвай линияси учун техник-иқтисодий асос (ТИА) ишлаб чиқилиши дастурдаги асосий лойиҳалардан бири ҳисобланади.

Шунингдек, дастур доирасида Тошкент шаҳар транспорт паркини янгилаш режалаштирилган. Бу доирада 200 та электробус ва уларга мўлжалланган қувватлаш ускуналари харид қилиниши кўзда тутилган. Ушбу чоралар пойтахтдаги зарарли моддалар чиқиндисини камайтириш ва экологик ҳолатни яхшилашга хизмат қилади.

Бундан ташқари, бошқа йирик шаҳарлар учун ҳам электробуслар ва қувватлаш инфратузилмасини харид қилиш бўйича ТИА ишлаб чиқилади. Хусусан, Нукус учун 50 та, Самарқанд учун 250 та ва Наманган учун 50 та электробус харид қилиниши режалаштирилмоқда. Ушбу лойиҳалар бўйича жами 350 та электробус харид қилиниши кўзда тутилган. ТИА лойиҳалар учун оптимал техник хусусиятларни аниқлаш ва иқтисодий самарадорликни баҳолаш имконини беради.

Дастур доирасида Урганч-Хива йўналишидаги троллейбус парки ҳам янгиланади. Бу йўналишда 10 та янги троллейбус харид қилиниб, йўловчи ташишни янада қулайроқ қилиш мақсад қилинган. Ушбу дастур жамоат транспорти сифатини ошириш ва атроф-муҳитни муҳофаза қилишга ҳисса қўшади. “Замин” янгиликларини “Telegram”да кузатиб боринг