“Бешагач” бозорининг ўрнида бизнес марказ қурилиши режалаштирилмоқда

Тошкент шаҳридаги “Бешагач” бозорининг ўрнида бизнес марказ қурилиши таклиф этилди.

Чилонзор тумани ҳокими ўринбосари Абдуҳамид Абдукодиров ва Туркиянинг Albayrak Holding компанияси ўртасида ўтказилган музокараларда мазкур лойиҳа илгари сурилди. Ҳокимият маълумотига кўра, лойиҳа ҳозирча фақат муҳокама босқичида бўлиб, уни амалга ошириш бўйича аниқ режа, муддат ва харажатлар ҳали белгиланмаган.

Музокаралар онлайн шаклда бўлиб ўтди, унда Ўзбекистон Республикаси Инвестициялар, саноат ва савдо вазирлиги вакиллари ҳам иштирок этди. Туман ҳокимияти лойиҳани яна кўриб чиқиш режалаштирилганини билдирди.

Ижтимоий тармоқлардаги муҳокамалардан сўнг ҳокимият шундай аниқлик киритди: “Ҳозирча турк компанияси томонидан илгари сурилган таклиф ўрганилмоқда. Агар шунга ўхшаш бошқа таклифлар тушса, ҳокимият инвесторлар билан ҳамкорликка тайёр.”

“Бешагач” бозори ҳудуди Фурқат ва Бешагач кўчалари кесишган жойда жойлашган бўлиб, 1930-йилларда қурилган уйлар билан ўралган.

Шу билан бирга, бошқа лойиҳалар доирасида “Аския” бозори ва Юнусобод бозорларида замонавий мажмуалар қурилиши режалаштирилган. Улардан бири – “Аския” бозорида савдо ва хизмат кўрсатиш маркази, яшил ҳудуд, меҳмонхона ва автотураргоҳлар қурилиши режалаштирилган. “Замин” янгиликларини “Telegram”да кузатиб боринг