Малайзиялик Five Petroleum Ўзбекистонда ёқилғи қуйиш шохобчалари тармоғини яратиши мумкин

Малайзиянинг Five Petroleum компанияси Ўзбекистонда ёқилғи қуйиш станциялари (ЁҚС) тармоғини ташкил этиш ва уни қўллаб-қувватлаш учун транспорт-логистика инфратузилмасини яратишни режалаштирмоқда, деб хабар берди “Ўзбекнефтгаз” матбуот хизмати.

Ҳамкорлик истиқболлари
“Ўзбекнефтгаз” раиси Баҳодир Сидиқов Five Petroleum бош директори билан учрашиб, Малайзия компанияси бренди остида ЁҚС тармоғини яратишни муҳокама қилди. Шунингдек, учрашувда хизмат ва маҳсулот сифатини ошириш учун замонавий технологиялар ва халқаро стандартларни жорий этиш масалалари кўтарилди.

Транспорт ва логистика
Компания Ўзбекистон ҳудудларида транспорт-логистика инфратузилмасини қуриш имкониятини ҳам кўриб чиқмоқда. Бу билан ёқилғи қуйиш шохобчаларини фаолият кўрсатиши учун зарур шароитлар яратилади.

Стратегик шериклик
Икки компания Ўзбекистоннинг ёқилғи-энергетика секторида стратегик аҳамиятга эга ташаббусларни қўллаб-қувватлаш ва шерикликни чуқурлаштиришга келишиб олди.

Қўшимча ташаббуслар
2024 йилнинг ёзида Ўзбекистоннинг Малайзиядаги элчиси Five Petroleum асосчиси ва бош директори Кинг Лим Чин Фуи билан учрашган эди. Учрашувда Самарқанд вилоятида инвестициявий лойиҳаларни амалга ошириш, ичимликлар ишлаб чиқарувчи корхоналар билан ҳамкорлик қилиш ва алюминий идишлар етказиб бериш масалалари муҳокама қилинган.

Компания ҳақида маълумот
Five Petroleum бренди 2020 йилда ташкил этилган бўлиб, ҳозирда Малайзия бўйлаб 110 дан ортиқ ЁҚС бошқаради. Шунингдек, компания BHPetrol акцияларининг 60 фоизига эгалик қилади ва унинг тармоғида 400 дан ортиқ ёқилғи қуйиш шохобчаси мавжуд.