Тошкент вилоятида минглаб аҳоли газ таъминотисиз қолди

28-феврал куни Тошкент вилояти Юқори Чирчиқ туманида газ сизиб чиқиши оқибатида минглаб аҳоли газ таъминотисиз қолди, деб хабар бермоқда "Ҳудудгазтаъминот" матбуот хизмати.

Авария эксковатор томонидан юқори босимли газ қувурининг шикастланиши натижасида содир бўлган. Оқибатда қуйидаги ҳудудларда газ узилиши кузатилди:

- 2 500 нафар аҳоли
- 7 та йирик истеъмолчи
- "Кўрсай", "Наврўз", "Жамбил" ва "Қизил Эмак" маҳаллалари

Ҳодиса жойида фавқулодда хизмат ходимлари ишламоқда. Расмийлар аҳолига етказилган ноқулайликлар учун узр сўради.

Бундан аввал Самарқандда ҳам юк машинаси юқори босимли газ қувурига зарар етказгани сабаб минглаб хонадонлар газ таъминотисиз қолган эди.