Марказий банк пул ўтказмалари назоратини кучайтирди

Марказий банк тўлов сервислари орқали амалга ошириладиган пул ўтказмалари юзасидан назоратни кучайтиришни маълум қилди, деб nova24.uz ёзади. Банк баёнотида қайд этилишича, бундан мижозлар учун ҳеч қандай қўшимча тўсиқ юзага келмайди.

Ички назорат қоидаларининг 312-пунктига кўра, 30 БРВ (11,2 миллион сўм) ёки ундан юқори миқдордаги электрон пул ўтказмаларида, тўлов маълумотлари билан бирга жўнатувчининг идентификацион маълумотлари ҳам тўлов ташкилотлари ва банклар ўртасида алмашиниши лозим.

Бу талаб мижоздан янги маълумот талаб қилмайди, балки аввалдан мавжуд идентификация маълумотлари автоматик равишда ушбу ўтказмаларга қўшилиши керак бўлади.

Аввалроқ, Марказий банк ва Иқтисодий жиноятларга қарши кураш бошқармаси айрим операциялар бўйича назоратни кучайтириш ҳақида кўрсатма берган эди.