Ўзбекистонда сайёҳлар сони илк бор 10 миллиондан ошди

Тошкент вилояти божхона бошқармаси расмий канали хабарига кўра, сўнгги йилларда Ўзбекистонда туризм соҳаси жадал ривожланди.

Туризм экспорти 1,6 баробарга ўсиб, 3,5 миллиард долларга етди. Бу соҳада 2 мингдан ортиқ янги тадбиркор ўз фаолиятини бошлади. Энг муҳими — ўтган йили хорижий сайёҳлар оқими илк бор 10 миллионлик маррадан ошди.

Ҳудудларда туризм ва сервис инфратузилмаси жуда тез суръатларда ривожланмоқда. Сўнгги 8 йилда маҳаллий ва хорижий инвесторлар томонидан 6,5 миллиард доллар сармоя киритилиб, 130 минг меҳмон қабул қилиш имконияти яратилди. Жорий йилда яна 30 мингга кўпайиши кутилмоқда.

Паркент туманидаги “Олтин бел” чўққисида халқаро даражадаги янги тоғ-чанғи зонаси қурилмоқда. Франциянинг машҳур “Куршавель” курорти ҳам Европача стандартларда туризм масканлари ташкил қилиш бўйича қизиқиш билдирган.

Президент таъкидлаганидек, “Бой тарихий-маданий меросимиз ва гўзал табиатимиз сайёҳлар сонини 2-3 баробар оширишга етади”.

2040 йилгача туризмнинг иқтисодиётдаги улушини 7 фоизга, экспортни 10 миллиард долларга етказиш бўйича стратегия ишлаб чиқилмоқда.