Ўзбекистонда шифохоналар янги тизимга ўтмоқда

7 май куни Президент Шавкат Мирзиёев тиббий хизматлар сифатини ошириш, дори воситаларидан самарали фойдаланиш ва тиббий таълимни такомиллаштириш масалаларига бағишланган йиғилиш ўтказди, деб nova24.uz сайти хабар берди.

Йиғилишда давлат раҳбари Ўзбекистонда поликлиникаларнинг ишлаш тизими тубдан ўзгариши ҳақида маълум қилди. Янги тартибга кўра, тиббий бригада ва унга бириктирилган аҳоли ўртасида икки томонлама шартнома тузилади, у орқали томонларнинг ҳуқуқ ва мажбуриятлари белгилаб қўйилади. Фуқаролар ўз оилавий шифокорини мустақил танлаш имкониятига эга бўлади. Бу шифокорлар қаторига хусусий мутахассислар ҳам киради.

Шунингдек, давлат томонидан кафолатланган тиббий ёрдам пакети тасдиқланди. Унга кўра, тиббий хизматлар ва дори воситалари тўлиқ давлат бюджети ҳисобидан қопланади.

Поликлиникаларда гинеколог шифокорлар сони икки баробар оширилади. Ҳар 3000 нафар болага битта янги педиатр бириктирилади.

Энди бошланғич тиббий ёрдам тизимида 0,5 ёки 0,25 ставкада ишлаш бекор қилинади. Барча шифокорлар ва ҳамширалар тўлиқ иш вақтида фаолият юритади.

Ҳар бир туманда участка ва оилавий шифокор пункти, поликлиникалар фаолияти оптималлаштирилади. 12 мингдан ортиқ аҳолига хизмат кўрсатаётган 7 та йирик поликлиника кичик поликлиникаларга айлантирилади. Туман марказий поликлиникаси эса тор ихтисослашган мутахассислар фаолият юритадиган маслаҳат-диагностика бўлимига айлантирилади. «Замин»ни Telegram’да ўқинг!