Оилавий шифокорлар ойига 1500 долларгача маош олади

Ўзбекистонда оилавий шифокорлар ойига 1500 доллар, ҳамширалар эса 800 долларгача маош олиши мумкин бўлган янги тизим жорий этилади, деб nova24.uz сайти хабар берди.

Президент Шавкат Мирзиёев маълум қилишича, ҳозирги кунда оилавий шифокорлар ўртача 500 доллар, ҳамширалар эса 300 доллар маош олади. Агар шифокор ва ҳамшира малака сертификати олса, уларга маош миқдорига тенг қўшимча тўлов берилади.

Агар улар сурункали касалликка чалинган беморлар билан ишлаб, уларга касаллик билан қандай яшашни ўргатишса, саратон, диабет, инсульт ва юрак хуружи каби касалликларни барвақт аниқлаш ва жиддий асоратларни олдини олишни тушунтиришса, ҳамда шошилинч тиббий ёрдамга мурожаатлар сонини камайтиришса — шифокорлар қўшимча 500 доллар, ҳамширалар эса 300 долларгача пул мукофоти олади.

“Биз шундай тизим яратишимиз керакки, оилавий шифокор ойига 1500 доллар, ҳамшира эса 600-800 доллар олади. Бу орқали нафақат маош, балки инсон қадрини оширамиз. Лекин натижа маошга мос бўлиши шарт”, — деди Президент.

Шунингдек, Президент саратон, инсульт, юрак хуружи, оналар ва болаларнинг барвақт ўлими ҳамда сурункали касалликлар туфайли ногиронлик ҳолатларини жамият учун фавқулодда ҳолат сифатида баҳолаш кераклигини таъкидлади. «Замин»ни Telegram’да ўқинг!