1 июлдан дори сотиш тартиби ўзгаради

Ўзбекистонда 1 июлдан бошлаб импорт дори воситаларини фақатгина расмий импортёрлар ва уларнинг расмий дилерлари сотиши мумкин бўлади, деб NOVA24 хабар берди. Мазкур тартиб Президентнинг 23 майдаги қароридан келиб чиқади.

Шунингдек, 1 сентябрдан бошлаб фармацевтика компаниялари ва аптекаларга лицензия беришда қўшимча талаблар жорий этилади:

• Фармацевтика фаолияти олиб бориладиган биноларга оид ижара ёки бепул фойдаланиш шартномалари солиқ органларида рўйхатдан ўтказилиши шарт.

• Дори воситаларини сотишда пластик карта ва бошқа электрон тўлов воситалари орқали тўловни қабул қилиш имконияти бўлиши лозим.

Агар солиқ текширувлари давомида компаниянинг контрафакт дори воситаларини (келиб тушиш ҳужжатларисиз) ёки рақамли маркировкасиз дори воситаларини харид қилиши, ташиши, сақлаши ёки сотиши аниқланса, лицензия вақтинча тўхтатилиши мумкин.

1 июлдан бошлаб Ўзбекистонга олиб кирилган дори воситаларини чакана ва улгуржи сотувчиларга фақатгина импорт қилувчи ташкилот ёки унинг расмий дилерлари орқали ва электрон ҳисоб-фактура асосида реализация қилишга рухсат берилади. Шу билан, мустақил воситачилар ва ваколатсиз ташкилотлар бундай дори воситаларини қонуний равишда сота олмайди.