20дан ортиқ туманда сел хавфи: 28 майдан ёмғир кутиляпти

“Ўзгидромет” хабар беришича, жорий йилнинг 28 майидан 2 июнига қадар кутилган ёмғирлар туфайли мамлакатнинг тоғли ва тоғолди ҳудудларида сел-сув тошқинлари содир бўлиши мумкин.

Жумладан, Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманларида; Сурхондарё вилоятида эса Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ва Музробод туманларида хавфли ҳолатлар кутилмоқда.

Шунингдек, Самарқанд вилоятининг Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой ва Иштихон туманлари ҳамда Навоий вилоятининг Хатирчи, Навбаҳор, Нурота, Конимех ва Кармана туманлари сел-сув хавфи остида қолиши мумкин.

Жиззах вилоятида Зомин, Бахмал, Ғаллаорол, Шароф Рашидов, Фориш ва Янгиобод туманлари; Тошкент вилоятида эса Оҳангарон, Бўстонлиқ, Паркент, Пискент, Ўрта Чирчиқ, Юқори Чирчиқ туманлари ва Ангрен ҳамда Олмалиқ шаҳарлари ҳам шундай хавфли ҳудудлар сифатида қайд этилмоқда.

Наманган вилоятининг Поп, Косонсой, Чортоқ, Чуст, Наманган ва Янгиқўрғон туманлари; Фарғона вилоятининг Сўх, Шоҳимардон, Фарғона ва Бешариқ туманлари ҳамда Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманлари ва Хонобод шаҳрида ҳам сел хатарлари бор.

Шу боис, тоғолди ва тоғли ҳудудларда истиқомат қилаётган фуқаролар, шу ерда дам олаётганлар ҳамда ҳайдовчилардан албатта эҳтиёткорлик чораларини кўриш сўралмоқда.

Шу билан бирга, баъзи ҳудудларда ёғингарчилик туфайли сувларнинг кўпайиши ҳудудларни сув босишига олиб келиши мумкинлиги ҳам маълум қилинди.