Ўзбекистон компаниялари $5 млнлик экспорт шартномалари тузди

Kursiv маълумотига кўра, Жаҳон банкининг E-Gate дастури орқали Ўзбекистон, Тожикистон ва Қирғизистондан 83 та компания Alibaba платформасига аъзо бўлиб, $23 миллионлик экспорт шартномаларини имзолашга эришди.

Ушбу ташаббус 2024 йил май ойида амалга оширилган бўлиб, иштирокчиларнинг тахминан 40%ини Ўзбекистондаги кичик ва ўрта бизнес вакиллари ташкил этди.

Ўзбекистон тадбиркорлари тўқимачилик, ёнғоқ, қуритилган мева ва бошқа маҳсулотлар экспорти бўйича $5 миллионлик шартномалар тузди. Асосий харидорлар Буюк Британия ва Янги Зеландиядан бўлди.

Жаҳон банкининг таъкидлашича, дастур марказий Осиё давлатлари ўртасида электрон савдони фаоллаштирди. Минтақавий экспорт ҳажми $16 миллионга етди.

2025 йил май ойи охирида Тошкентда ўтказилган e-commerce бўйича минтақавий конференцияда Ўзбекистон, Қирғизистон ва Тожикистон e-commerce уюшмалари ўзаро ҳамкорлик тўғрисида меморандум имзолашди. Ҳужжат трансчегаравий электрон савдога шароит яратишни назарда тутади.

Мутахассислар фикрига кўра, Ўзбекистон, Қозоғистон, Қирғизистон ва Тожикистондаги e-commerce бозори ҳажми $3 миллиардга етса-да, рақамли инфратузилманинг суст ривожланиши, логистика харажатларининг юқорилиги ва рақамли саводхонлик даражасининг пастлиги унинг ўсишини секинлаштирмоқда.

Қолаверса, мураккаб солиқ тизими ва етказиб беришдаги муаммолар сабабли кўплаб интернет савдо фаолиятлари ҳали ҳам “сояда” қолмоқда. Ҳуқуқий база эса сотувчи ва харидор эҳтиёжларига мос эмас.

Марказий Осиёда ягона электрон бозор шаклланмагани туфайли e-commerce соҳаси ўсиши чекланмоқда, дея хулоса қилишди конференция қатнашчилари.