Ўзбекистонликлар Қурбон Ҳайитда неча кун дам олади?

2025 йилда муқаддас Қурбон Ҳайит байрамининг биринчи куни 6 июнга тўғри келади, деб UPL.uz хабар берди. Бу сана Ўзбекистон мусулмонлари идораси фатволар маркази томонидан Ислом тақвимига асосан маълум қилинди. Зул-ҳижа ойи 28 май, чоршанба кунидан бошлангани боис, Арафа куни 5 июн, Қурбон ҳайитининг биринчи куни эса 6 июн деб белгиланди.

Бу сана халқаро манбалар томонидан ҳам тасдиқланган. Жумладан, 27 май куни Саудия Арабистони Олий суди Қурбон ҳайити 6 июн, жума куни нишонланишини маълум қилган. Ордан бир кун ўтиб Қозоғистон мусулмонлар идораси ҳам шундай баёнот берди.

Ўзбекистон Бандлик ва камбағалликни қисқартириш вазирлиги 2025 йил учун иш вақти меъёрларининг янгиланган тақвимини эълон қилди. Ушбу тақвим Президентнинг 2025 йил 26 мартдаги ПҚ-124-сон қарорига мувофиқ тайёрланган. Ҳужжатда Қурбон ҳайити биринчи куни 6 июн, жума кунига тўғри келиши кўрсатилган.

Меҳнат кодексининг 208-моддасига кўра, Қурбон ҳайитнинг биринчи куни байрам сифатида дам олиш куни ҳисобланади. Шу билан, беш кунлик иш ҳафтаси бўлган фуқаролар 6 июндан 8 июнгача (жума—якшанба) 3 кунлик таътилга чиқишади. Олти кунлик иш режимида ишловчилар эса 6 ва 8 июнда дам олишади.