Тошкентда бир одам учун ойлик харажат $484 ни ташкил қилади

Numbeo платформаси ҳар йили тузадиган ҳаёт нархи индексида Ўзбекистон 127-ўринни эгаллади, деб UPL.uz хабар берди.

2025 йилда эълон қилинган маълумотларга кўра, Ўзбекистон индекси 100 баллик шкалада 24,2 ни ташкил этди. Солиштириш учун Нью-Йорк индекси 100 деб қабул қилинган. Бу шундай деганики, агар мамлакат индекси 100 дан юқори бўлса, у ҳолда яшаш харажатлари (ижарадан ташқари) Нью-Йоркдан ҳам юқори бўлади. Масалан, 120 индексга эга давлатда кундалик харажатлар Нью-Йоркдан 20% қиммат.

Тошкентда бир киши учун ойлик харажат (ижарасиз) тахминан $484 (тақрибан 6,260,000 сўм), тўрт кишидан иборат оила учун эса $1 643 (тақрибан 21,240,000 сўм) ни ташкил этади.

Ҳудудий рейтингда Ўзбекистонни қўшни Қозоғистон (116-ўрин) ва Қирғизистон (118-ўрин) ортда қолдирди. Бироқ, хавфсизлик индекси бўйича Ўзбекистон 72,1 балл билан 27-ўринни эгаллади. Бу фуқаролар ва сайёҳлар ўзини хавфсиз ҳис қилаётганини, ҳуқуқ-тартибот органлари самарали ишлаётганини кўрсатади.

Аҳолининг харид қобилияти индекси 44,5 балл этиб баҳоланган бўлиб, бу фуқароларнинг имкониятлари ўрта даражада эканини англатади.

Тадқиқотга кўра, дунёдаги энг қиммат яшаш ҳудудлари — Американинг Виргин ороллари ва Швейцария (индекси 98,4), учинчи ўринда эса Исландия (83,4) жойлашди. Рўйхатнинг энг пастки қисмида эса Покистон, Ливия ва Миср турибди — бу мамлакатларда ҳаёт энг арзон деб баҳоланган.

Numbeo таҳлилчилари ушбу рейтингни шакллантиришда дунё бўйлаб фойдаланувчилар томонидан тақдим этилган маҳсулотлар, уй-жой, транспорт ва коммунал хизматлар нархларини ўрганган.

Маълумот учун, 2024 йили Ўзбекистон жаҳон тинчлик ва хавфсизлик индексида 163 мамлакат орасида 60-ўринни эгаллаб, 26 поғона юқори кўтарилган. МДҲ давлатлари орасида эса Қозоғистон (59), Тожикистон (72), Қирғизистон (78) ва Туркманистон (83) жой олган.

Ҳаёт нархи паст бўлишига қарамай, Ўзбекистонда хавфсизлик юқори даражада ва бу омил мамлакатни яшаш ва саёҳат учун жозибадор қилиб қўяди. 2024 йилда Ўзбекистон Марказий Осиёнинг энг оммабоп 10 туризм йўналиши қаторига кирди.