Тошкент вилоятидаги Sea Breeze лойиҳасига 5 млрд доллар сармоя киритилади

Тошкент вилоятидаги Sea Breeze курорти қурилишига 5 миллиард доллар сармоя киритилади, деб nova24.uz хабар берди.

Ўзбекистон Инвестициялар, саноат ва савдо вазирлиги маълумотларига кўра, лойиҳага Озарбайжоннинг Agalarov Development компанияси сармоядор сифатида жалб этилган.

Курорт умумий 577 гектар майдонда барпо этилади, шундан 100 гектари биринчи босқичда ўзлаштирилади. Ушбу мега-лойиҳа туризм инфратузилмасини ривожлантириш, янги иш ўринларини яратиш ва хорижий сайёҳларни жалб қилишга хизмат қилади.

Лойиҳа доирасида ҳудуд 10 та компакт зонага бўлинади ва ҳар бирида дам олиш объектлари ва хизматлар мавжуд бўлади. Шунингдек, сув ҳавзасининг икки соҳилини боғловчи кўприк қурилади.

Соҳилларда бульвар, пляжлар ва дам олиш масканлари, тоғ етакларида меҳмонхоналар, коттежлар, турар жойлар, ресторанлар ва томоша майдонлари барпо этилади. Лойиҳа доирасида маданий, таълим, тиббий ва спорт объектлари ҳам қурилади. Бу эса комплексни нафақат сайёҳлар учун, балки доимий яшашга мўлжалланган ҳудудга айлантиради.