Mobiuz 300 миллион долларга сотилиши мумкин

Ўзбекистон мобил алоқа оператори Mobiuz’ни сотиш орқали 300 миллион доллар миқдорида маблағ жалб қилишни режалаштирмоқда, деб Bloomberg манбаларига таяниб Kursiv.media хабар берди. Ҳукумат Қатар, Саудия Арабистони, Озарбайжон ва Европадан келадиган инвесторларни қизиқтиришга умид қилмоқда.

Mobiuz мамлакатдаги тўртинчи йирик мобил оператор ҳисобланади. BMI таҳлилий компанияси маълумотларига кўра, 2024 йил охирига келиб унинг бозордаги улуши 20,9% ни ташкил қилган. Ўша вақтда Ўзбекистонда умумий абонентлар сони 35,6 миллион нафарни ташкил этган. 2024 йилда Mobiuz 164 миллион доллар даромад ва 41 миллион доллар миқдорида EBITDA қайд этган.

Kомпаниянинг 100% улушини сотиш жараёни Президент Шавкат Мирзиёев томонидан бошланган кенг қамровли хусусийлаштириш дастури доирасида амалга оширилмоқда. Ўзбекистон 29 та йирик компаниядаги активларни хусусийлаштириш орқали камида 10 триллион сўм ($786 миллион) маблағ жалб қилишни режалаштирган. Бу — давлат иқтисодиётидаги улушини камайтириш ва тўғридан-тўғри хорижий инвестицияларни жалб қилиш стратегиясининг бир қисми ҳисобланади.

Mobiuz’ни сотиш бўйича тендер 2025 йил июнь ойида эълон қилинган. Қизиққан инвесторлар 1 августга қадар қизиқиш хатларини тақдим этишлари керак. Bitimга консультант сифатида Rothschild & Co жалб қилинган.

VEON компанияси Ўзбекистонда ўз бизнесини кенгайтириш имкониятларини мунтазам ўрганиб бораётганини маълум қилди. Бироқ, у мазкур тендерда иштирок этишини расман тасдиқламади. «Замин»ни Telegram’да ўқинг!