Тошкент вилоятининг Бўстонлиқ туманида содир бўлган воқеа ижтимоий тармоқларда катта муҳокамаларга сабаб бўлди. Турли ёзги уйлар яқинидаги Чорвоқ сув омборидан чиқаётган мутлақ ифлос ва ҳидли сув тасвирлари интернет фойдаланувчиларини ҳушёрликка чақирди.
Кўрилган видеоязувларда канализация қувурлари тўғридан-тўғри омборга улангани аниқ кўзга ташланарди. Бу ҳолат кўпчиликда нафақат ҳайрат, балки жиддий хавотир уйғотди.
Олиб борилган суриштирувлар натижасида Бурчмулла маҳалласига яқин ҳудуддаги айрим фуқаролар томонидан канализация, ёмғир ва суғориш сувларини оқава сифатида тўғридан-тўғри Чорвоқ сув омборига йўналтириш мақсадида махсус ариқлар қазилгани ва пластик қувурлар ўрнатилгани маълум бўлди.
Бу нафақат экологик мувозанатга, балки оммавий саломатликка ҳам жиддий хавф соладиган қўпол қоидабузарликдир.
Экологик назорат органлари, ички ишлар ва жиноят-профилактика хизматлари иштирокида олиб борилган таҳлиллар натижасида мазкур жойда сув омборига масъул бўлган ишчига нисбатан қонуний чора кўрилди.
Унга нисбатан Ўзбекистон Республикаси Жиноят кодексининг 82-моддаси 2-қисми асосида маъмурий баённома расмийлаштирилди. Ҳуқуқбузар 10 баробар БРВ (4 миллион 120 минг сўм) миқдорида жаримага тортилиб, ўз қилмиши учун жавоб берди.
Энг муҳими, мутахассислар томонидан ноқонуний қазилган ариқлар ва ўрнатилган канализация қувурлари бутунлай демонтаж қилинди.
Бу воқеа яна бир бор исботлайдики, экологик қоидаларга беэътиборлик жамият хавфсизлигига жиддий таҳдид солади. Давлат органлари бундай ҳолатларга нисбатан кескин чора кўришда давом этади.
«Замин»ни Telegram’да ўқинг!
