2025/2026-ўқув йили қачондан бошланади

Олий таълим, фан ва инновациялар вазирлиги буйруғига кўра, 2025/2026 ўқув йили босқичма-босқич бошланади, деб Kursiv.media хабар берди.

3 сентябрдан академик лицейларнинг барча босқич ўқувчилари ҳамда олий таълим муассасаларининг 1-босқич талабалари учун дарслар старт олади.

8 сентябрдан эса олий таълим муассасаларининг 2 ва ундан юқори босқич талабалари учун машғулотлар бошланади.

1-босқич талабалари учун «Кредит таълими тизимига кириш» ҳафталиги ва «Талабаликка бағишлов» тадбирлари ташкил этилади. Бу даврда талабалар таълим муассасалари фаолияти билан таништирилади, кредит-модул тизими тушунтирилади, танлов фанларини тўғри танлаш бўйича маслаҳатлар берилади.

Шунингдек, мустақил таълим кўникмаларини шакллантириш, академик ҳалоллик тамойилларини сингдириш ҳамда касбий ва шахсий ривожланиш бўйича тарғибот-ташвиқот ишлари олиб борилади.

Нодирбек Раззоков

«ЗАМИН.УЗ» муҳаррири