Пойтахтга сотиш учун ноқонуний йўл билан олиб келинаётган йирик миқдордаги яроқсиз гўшт фош этилди. Ички ишлар вазирлигининг маълумот беришича, Қашқадарё вилоятидан Тошкентга йўл олган 600 килограммдан ортиқ гўшт маҳсулоти тегишли ҳужжатларсиз ва санитария қоидаларига зид равишда ташилаётгани аниқланган.
Маълумотларга кўра, бу гўштлар Cobalt русумли автомобиль салони ва юкхонасига жойлаштирилган ҳолда олиб кетилаётган. Лаборатория текширувлари натижасида, ҳайвон гўшти истеъмолга мутлақо яроқсиз экани аниқланди. Маҳсулот зарарсизлантириш мақсадида ёқиб йўқ қилинган.
Шунингдек, расмий маълумотларга кўра, жорий йилнинг ўтган даври мобайнида Жиззах вилояти ҳудудида ҳам 1,5 тоннадан ортиқ яроқсиз гўшт истеъмолга чиқиб кетишининг олди олинган.
Ушбу ҳолат юзасидан 29 ёшли ҳайдовчига нисбатан Маъмурий жавобгарлик тўғрисидаги кодекснинг тегишли моддалари асосида баённома расмийлаштирилди. Суд қарорига мувофиқ, унга 412 минг сўм миқдорида жарима жазоси тайинланди.
Мутасадди идоралар аҳолини яна бир бор огоҳлантириб, харидорлар ҳар қандай гўшт маҳсулотини сотиб олишдан олдин сотувчидан тиббий дафтарча ҳамда ветеринар хулосасини талаб қилиши шартлигини эслатди. Чунки бу ҳужжатларсиз сотилаётган маҳсулотлар истеъмолчилар ҳаёти ва соғлиғи учун жиддий хавф туғдириши мумкин.
Масъуллар таъкидлаганидек, бундай ҳолатларга йўл қўймаслик учун ҳар бир фуқаро ўзини ва яқинларини ҳимоя қилиш мақсадида эътиборли ва талабчан бўлиши зарур.
«Замин»ни Telegram’да ўқинг!
