Ўзбекистон президенти Шавкат Мирзиёев 3 сентябрь куни Пекин шаҳрида Иккинчи жаҳон уруши якунлангани ва Хитойнинг япон босқинидан озод этилганига 80 йил тўлиши муносабати билан ўтказиладиган ҳарбий парадда иштирок этади. Бу ҳақда Курсив.медиа хабар берди.
Тантанага Қозоғистон, Қирғизистон, Тожикистон ва Туркманистон президентлари таклиф этилган. Хитойга Россия, Беларус, Арманистон, Озарбайжон етакчилари, шунингдек, 2019 йилдан бери биринчи марта КХДР раҳбари Ким Чен Ин келади. Ҳаммаси бўлиб 21 нафар хорижий етакчи таклиф олди.
Парад пандемиядан кейинги энг кенг кўламли парад бўлади. Томошабинларга биринчи марта гипертовушли ракеталар, радиоэлектрон кураш тизимлари, янги авлод дронлари, ЗТЗ-201 танклари ва "Dunfen-31" ракета комплекслари намойиш этилади.
Намойишда 10 мингга яқин ҳарбий, 100 дан ортиқ самолёт ва юзлаб замонавий техникалар иштирок этади. Байрам тадбирлари ШҲТ саммитининг давоми бўлади.
«Замин»ни Telegram’да ўқинг!
