Ўзбекистоннинг Россиядаги элчиси Ботиржон Асадов Москвада ўтказилган давра суҳбатида икки давлат алоқалари ҳозирги пайтда тарихий юқори босқичга чиққанини таъкидлади. Бу ҳақда Kursiv.media хабар берди.
Дипломатнинг сўзларига кўра, икки мамлакат муносабатларининг мустаҳкам асоси — доимий ишончли мулоқот, парламент ва ҳукумат даражасидаги алоқалар, саноат кооперацияси ҳамда маданий-гуманитар ҳамкорликдир.
Охирги саккиз йилда икки давлат ўртасидаги савдо ҳажми уч баробарга яқин ўсди. Кейинги беш йилда уни 30 миллиард долларга етказиш режалаштирилган. Россия эса Ўзбекистон иқтисодиётига энг кўп инвестиция киритувчи ҳамкорлардан бири ҳисобланади.
Шу билан бирга, россиялик сайёҳларнинг Ўзбекистонга қизиқиши ҳам ошиб бормоқда. Жорий йилнинг саккиз ойида туризм оқими 12% га кўтарилиб, 550 мингга яқин одам ташриф буюрган. Яқин кунларда Шавкат Мирзиёев ва Владимир Путин Хитойда учрашиб, ҳамкорлик масалаларини муҳокама қилади.
«Замин»ни Telegram’да ўқинг!
