Ўзбекистонда транспорт хавфсизлигини кучайтириш ва йўловчиларнинг ҳаётини ҳимоя қилишга қаратилган янги қонун қабул қилинди. Сенатнинг навбатдаги ялпи мажлисида маъқулланган ҳужжатга кўра, энди темир йўл ва метро тизимида йўловчи ташиш қоидаларини бузган мансабдор шахслар қаттиқ жавобгарликка тортилади.
Янги тартибга биноан, бундай ҳолатлар аниқланса, қоидабузар мансабдор шахс БҲМнинг 10 баравари миқдорида жарима тўлайди. Мутасаддиларнинг таъкидлашича, бу чора нафақат интизомни кучайтириш, балки йўловчилар учун хавфсиз ва қулай шарт-шароит яратишга қаратилган.
Шунингдек, халқаро ва шаҳарлараро йўналишларда хизмат қиладиган ҳайдовчиларнинг меҳнат ва дам олиш тартибини бузиши ҳам алоҳида назоратга олинмоқда. Агар бундай ҳолат кузатилса, ҳайдовчилар БҲМнинг 7 баравари миқдорида жаримага тортилади.
Мутахассислар фикрича, транспорт соҳасида қатъий жавобгарлик тизимининг жорий этилиши тартиб-интизомни мустаҳкамлайди ва йўловчиларнинг хавфсизлигини таъминлайди. Шу билан бирга, бундай чоралар жамоат транспортига бўлган ишончни ҳам оширади.
Сенаторлар таъкидлаганидек, қонун кучга киргач, ташувчилар ва ҳайдовчиларнинг масъулияти янада ортирилади. Бу эса мамлакатдаги транспорт хизматлари сифати ва хавфсизлиги учун муҳим қадам сифатида баҳоланмоқда.
«Замин»ни Telegram’да ўқинг!
