Ўзбекистон олий таълим муассасаларида таҳсил олаётган ёшлар орасида жиноятчилик ҳолатлари тобора кўпайиб бораётгани Сенатнинг 10-ялпи мажлисида муҳокама қилинди. Расмий маълумотларга кўра, жорий йилнинг дастлабки ярмида 102 та олийгоҳнинг 307 талабаси турли жиноятларда иштирок этган.
Солиштириш учун, 2024 йилда талабалар иштирокида 761 та жиноят қайд этилган эди. Бу йилнинг атиги олти ойи ичидаги рақамлар эса ҳолатнинг қай даражада жиддийлашганини кўрсатади.
Содир этилган жиноятларнинг асосий қисмини йўл-транспорт ҳодисалари, ўғрилик, безорилик, фирибгарлик ва турли тан жароҳатлари ташкил этган. Географик кесимда эса энг кўп қоидабузарликлар пойтахт ва йирик ҳудудларда — Тошкент шаҳри, Тошкент, Бухоро, Наманган, Андижон, Самарқанд, Фарғона ҳамда Сурхондарё вилоятларида содир этилган.
Олийгоҳлар бўйича эса Тошкент давлат транспорт университети, Ўзбекистон миллий университети, Тошкент давлат техника университети, Ахборот технологиялари университети ва Тошкент давлат иқтисодиёт университети етакчи ўринларни эгаллаган.
Мутахассислар таъкидлашича, кўп ҳолларда жиноятлар талабаларнинг ўқиш жараёнидаги бўш вақтларида, яъни соат 08:00 дан 16:00 гача содир этилган. Бу эса таълим муассасаларида назоратнинг етарли даражада эмаслигидан далолат беради.
Шунингдек, сенаторлар талабалар учун турар жойлар ва уларнинг назоратида ҳам жиддий камчиликлар мавжудлигини қўшимча равишда таъкидлашди. 2021 йилда қабул қилинган қарорга кўра, ҳар бир талабага тютор бириктирилиши лозим эди. Бироқ кўпгина олийгоҳларда бу талабга риоя қилинмаяпти.
Фақат талабалар эмас, балки соҳада фаолият олиб бораётган масъул шахсларга нисбатан ҳам коррупция билан боғлиқ жиноят ишлари қўзғатилгани маълум қилинди. Бу эса аҳолида адолатсизликка қарши шикоятлар ва норозиликларни кучайтирмоқда.
Муҳокама якунида Сенат Олий таълим, фан ва инновациялар вазири Қўнғиротбой Шариповга парламент сўрови юбориш ҳақида қарор қабул қилди. Мақсад — талабалар орасида жиноятчиликнинг олдини олиш ва тизимдаги камчиликларни бартараф этиш.
«Замин»ни Telegram’да ўқинг!
