Ўзбекистонда таълим соҳасида яна бир янги ислоҳот жорий этилади. Президент Шавкат Мирзиёев 9 сентябрь куни ўтказган видеоселектор йиғилишида маълум қилинишича, енди мактабни юқори баҳолар билан тамомлаган иқтидорли ёшлар айрим олий таълим муассасаларининг 2-курсига тўғридан-тўғри қабул қилинади, деб хабар берди kursiv.media.
Янги тизим нимани англатади?
Аввал талабалар мактабдан кейин олийгоҳнинг 1-курсига кириб, кейин босқичма-босқич ўқишни давом эттирар эди. Янги ислоҳот орқали эса тажрибаси ва билим савияси юқори бўлган мактаб битирувчилари вақтни тежаб, тўғридан-тўғри 2-курсдан бошлаб ўқиш имконига эга бўлади. Бу энг аввало, иқтидорли ёшларни қўллаб-қувватлаш ва уларнинг салоҳиятини амалиётда рўёбга чиқаришга хизмат қилади.
Янгича мактаблар ва уларнинг роли
Президент таъкидлаганидек, иқтидорли ўқувчилар учун махсус имкониятлар яратиш мақсадида қатор филиал мактаблар ташкил этилади. Жумладан:
-
ахборот технологиялари соҳасида – Ал-Хоразмий мактаблари,
-
муҳандислик йўналишида – Мирзо Улуғбек мактаблари,
-
табиий фанларда – Ибн Сино мактаблари.
Энг қизиғи шундаки, бу мактаблар ҳудудлардаги техника олийгоҳларига номма-ном бириктирилади. Натижада ўқувчиларнинг олий таълимга қадам қўйиши янада тизимли ва манзилли бўлади.
Халқаро олимпиадалар – Ўзбекистонда
Янги янгиликлардан яна бири – 2026 йилда мактаб ўқувчилари ўртасидаги энг нуфузли иккита халқаро олимпиада – кимё ва информатика бўйича беллашувлар илк бор Марказий Осиёда, айнан Ўзбекистонда ташкил этилади.
Пойтахт Тошкентда ўтадиган мазкур олимпиадаларни юқори савияда ўтказиш вазифаси Бош вазир зиммасига юклатилди. Бу эса Ўзбекистоннинг халқаро нуфузини ошириш билан бирга, маҳаллий ёшлар учун ҳам катта рағбат бўлиши кутилмоқда.
«Замин»ни Telegram’да ўқинг!
