Астана Hub ва IT Park Uzbekistan Market Entry номли акселерация дастурини ишга туширди, деб Spot.uz хабар берди. Бу дастур орқали ўзбекистонлик стартаплар Қозоғистон бозорига чиқишда ёрдам олади. Аризалар 20 сентябргача қабул қилинади.
Market Entry дастури ўз бизнесини Қозоғистонда кенгайтирмоқчи бўлган технологик стартаплар учун мўлжалланган. Дастур доирасида юридик шахс сифатида рўйхатдан ўтиш, субсидиялар ва солиқ имтиёзларини олишда ёрдам кўрсатилади.
Қатнашчилар маҳаллий қонунчилик ва солиқ тизимига мослашиш, янги аудиторияда маҳсулотларини синовдан ўтказиш ва пилот лойиҳаларни тайёрлаш имкониятига эга бўладилар. Шунингдек, эҳтимолий мижозлар ва ҳамкорлар билан учрашувлар ташкил этилади.
Дастур иштирокчиларига қуйидагилар таклиф этилади:
Астана шаҳрида икки нафар жамоа аъзоси учун офис ва коливинг;
асосий соҳаларда мутахассислар билан менторлик сессиялари;
персонал трекерлар билан ишлаш имконияти;
кўргазмалар, форумлар ва соҳавий тадбирларда қатнашиш имконияти.
Market Entry дастурининг очилиши 3 октябрда Digital Bridge халқаро форуми доирасида бўлиб ўтади. Машғулотлар 6 октябрдан бошланиб, 8 ҳафта давом этади.
Акселераторнинг якуний босқичи – Demo Day – 5 декабрь куни бўлиб ўтади. Қатнашчилар ўз лойиҳаларини инвесторлар ва венчур жамғармаларга тақдим этишади.
«Замин»ни Telegram’да ўқинг!
