Ўзбекистонда 18 сентябрь куни ҳаво шароити турли ҳудудларда турлича кечиши кутилмоқда. “Ўзгидромет” тарқатган маълумотларга кўра, айрим вилоятларда қисқа муддатли ёмғир ёғиши мумкин, баъзиларида эса ҳаво қуруқ бўлади.
Тошкент шаҳрида куннинг биринчи ярмида осмон бироз булутли бўлади. Ёмғир эҳтимоли бор, шамол эса шимоли-шарқдан сониясига 3–8 метр тезликда эсиши кутилмоқда. Айрим вақтларда шамол кучи 10–12 метргача етиши мумкин. Ҳарорат кечаси 12–14, кундузи эса 23–25 даража атрофида бўлади.
Қорақалпоғистон ва Хоразм вилояти аҳолиси нисбатан барқарор ҳавони кутиши мумкин — булутлар озгина кўриниб турса-да, ёғингарчилик кузатилмайди. Бу ерларда кечаси 8–13 даража, кундузи эса 20–25 даража иссиқ бўлиши прогноз қилинган.
Бухоро ва Навоийда кечаси ҳамда эрталаб қисқа ёмғир кузатилиши эҳтимолдан холи эмас. Кечаси 10–15 даража, кундузи эса 23–28 даража атрофида бўлади.
Тошкент вилояти ҳамда Сирдарё, Жиззах ва Самарқандда ҳам қисқа муддатли ёмғирлар бўлиши мумкин. Ҳарорат бу ерларда кечаси 10–15, кундузи эса 20–25 даража атрофида бўлади.
Қашқадарё ва Сурхондарёда ҳаво бироз булутли бўлиб, айрим жойларда ёмғир ёғади, лекин кўп қисми қуруқ ўтади. Ҳарорат кундузи 25–30 даража, кечаси эса 13–18 даража.
Фарғона водийси — Андижон, Наманган ва Фарғона вилоятларида қисқа ёмғирлар ва кучли шамоллар кузатилиши мумкин. Айрим ҳудудларда шамол 18 метр/секундгача кучайиши, чанг-тўзон кўтарилиши эҳтимоли бор. Ҳарорат кечаси 10–15, кундузи эса 20–25 даража бўлади.
Тоғли ҳудудларда эса ҳаво салқин. Вақти-вақти билан ёмғир ёғади, баланд ҳудудларда эса қорга айланиши эҳтимоли бор. Бу ерларда ҳарорат кундузи 10–15, кечаси эса 5–10 даража атрофида бўлади.
“Ўзгидромет” ҳафта ўрталарига келиб ҳаво ҳарорати сезиларли даражада пасайишини аввалроқ маълум қилганди. 19 сентябрдан эса салқин ҳаво массалари республикадан секин-аста чекинишни бошлайди.
Мутахассислар аҳолига эҳтиёткорлик чораларини кўришни, айниқса шамол кучайиши мумкин бўлган ҳудудларда йўлларда сергакликни оширишни тавсия қилмоқда.
«Замин»ни Telegram’да ўқинг!
