17 сентябрь куни Женева шаҳрида Ўзбекистон Президенти Администрацияси раҳбари Саида Мирзиёева Жаҳон савдо ташкилоти (ЖСТ) Бош директори Нгози Оконжо-Ивеала билан учрашув ўтказди. Бу ҳақда Мирзиёева ўзининг шахсий ижтимоий тармоқ саҳифасида хабар берди.
Суҳбат давомида мамлакатимизда амалга оширилаётган ислоҳотлар жараёни, ЖСТга аъзо бўлиш йўлидаги истиқболлар ҳамда жараёнда юзага келиши мумкин бўлган қийинчиликлар муҳокама қилинди. Саида Мирзиёева фикр алмашув чоғида Ўзбекистоннинг халқаро савдо тизимида ўз мажбуриятларини сидқидилдан бажаришга интилаётганини таъкидлади.
Шу билан бирга, у Нгози Оконжо-Ивеалага раҳбар сифатидаги кучли лидерлиги ва доимий қўллаб-қувватлаши учун самимий миннатдорлик билдирди. Музокараларда ишонч ва ҳамкорликнинг глобал савдо жараёнларида тутган ўрни алоҳида қайд этилди.
Айтиш жоизки, бу икки раҳбарнинг илк учрашуви эмас. 2023 йил июнь ойида Тошкентда ўтган “Ўзбекистондаги иқтисодий ислоҳотлар ва ЖСТга аъзо бўлиш жараёни” мавзусидаги конференцияда ҳам улар юзма-юз мулоқот қилган. Шунингдек, ўша йили сентябрда ҳам Саида Мирзиёева Женевага ташриф буюриб, ЖСТ раҳбари билан учрашган эди.
Эслатиб ўтамиз, жорий йилнинг 14 май куни Президент Шавкат Мирзиёев ЖСТга аъзо бўлиш жараёнини тезлаштириш масаласига бағишланган йиғилиш ўтказганди. Давлат раҳбари ушбу жараённи тизимли ва сифатли ташкил этиш юзасидан аниқ топшириқлар берган.
Мутахассислар фикрича, Ўзбекистоннинг ЖСТга қўшилиши мамлакат учун янги бозорлар эшигини очиши, рақобатбардошликни кучайтириши ва миллий иқтисодиётнинг глобал интеграциясига туртки бўлиши мумкин.
«Замин»ни Telegram’да ўқинг!
