Ўзбекистонда йўл ҳаракати хавфсизлигини таъминлаш ва ҳайдовчиларнинг ҳақли эътирозларини инобатга олиш мақсадида муҳим қонунчилик ўзгариши амалга оширилди. Сенат томонидан маъқулланган янги қоидага кўра, эндиликда радар ва фото-видеофиксация қурилмалари ёрдамида қайд этилган ҳуқуқбузарликлар бўйича жарималар фақатгина 1 ой ичида қўлланиши мумкин бўлади.
Аввалги тартиб ўзгарди
Маълумки, аввалги қонунчиликка кўра, бундай жарималарни белгиллаш муддати бир йилгача чўзилиши мумкин эди. Бу эса кўплаб ҳайдовчилар орасида норозилик ва турли муаммоларни келтириб чиқарарди. Янги қонун билан бу тартиб тубдан ўзгарди ва муддат бир ойгача қисқартирилди. Сенаторларнинг таъкидлашича, ушбу ислоҳот ҳайдовчиларнинг ишончини мустаҳкамлашга хизмат қилади.
Огоҳлантириш тизими жорий этилди
Шунингдек, янги қонунчиликка кўра, йўл ҳаракати қоидаларининг унча жиддий бўлмаган бузилишлари учун ҳайдовчиларга тўғридан-тўғри жарима эмас, балки маъмурий огоҳлантириш бериш амалиёти йўлга қўйилади. Мутасаддиларнинг фикрича, бу чора нафақат адолатни таъминлайди, балки ҳайдовчиларнинг масъулиятини оширишга ҳам туртки беради.
Янгиликнинг аҳамияти
Мазкур қонунчилик ўзгариши ҳайдовчилар учун қулайлик яратиш, тизимда шаффофлик ва ишончни оширишга қаратилган. Шу билан бирга, йўлларда тартиб ва интизомни мустаҳкамлашда ҳам муҳим аҳамият касб этади.
«Замин»ни Telegram’да ўқинг!
