Жорий йилнинг 15 сентябрь куни Мактабгача ва мактаб таълими вазирлиги томонидан қабул қилинган махсус буйруқ билан умумий ўрта таълим муассасаларида фаолият олиб бораётган хорижий тил ўқитувчилари учун янги имтиёзлар белгиланди. Унга кўра, камида B2 даражадаги сертификатга эга бўлмаган педагогларга 2025 йил якунига қадар ўз меҳнат фаолиятини давом эттиришга рухсат берилди. Бу қарор ўқитувчиларнинг ишдан айрилмаслиги ва таълим жараёнининг узлуксизлигини таъминлаш мақсадида қабул қилинган.
Буйруқда таъкидланишича, умумий ўрта таълим мактабларида фаолият юритаётган барча хорижий тил ўқитувчилари, шу жумладан, сертификат талабига жавоб бермайдиганлар ҳам, 2025 йилнинг якунига қадар ўз ишларини давом эттириши мумкин. Шу билан бирга, сертификатлари ўз амал қилиш муддати давомида тугайдиган ўқитувчилар ҳам якунланадиган ўқув йилининг сўнгига қадар ишлаш имкониятига эга бўлади.
Шунингдек, мазкур қоидалар асосида вакант лавозимларга олий таълим муассасаларида хорижий тиллар ўқитувчиси мутахассислиги бўйича таҳсил олаётган 3-4-курс талабалари ҳам жалб қилинади ва улардан кадрлар захираси шакллантирилади.
Вазирлик шунингдек, 1 декабрга қадар миллий ва халқаро сертификат имтиҳонларига тайёргарлик жараёнида квалификацияли мутахассислар қатнашиши билан қўшимча ўқув машғулотлари ташкил этилишини белгилади. Бу чора-тадбирлар орқали сертификатга эга бўлмаган ўқитувчиларнинг малакаси янада оширилади ва уларнинг таълим жараёнида самарали фаолият кўрсатиши таъминланади.
Эслатиб ўтамиз, аввалроқ Ўзбекистон таълим ва фан ходимлари касаба уюшмалари халқаро тил сертификати йўқ ўқитувчиларни ишдан бўшатмаслик бўйича вазирликка таклиф киритган эди. Бу янгилик педагоглар учун катта имтиёз бўлиб, уларнинг меҳнат фаолиятини ҳимоя қилади ва мактабларда таълим сифати узлуксизлигини таъминлайди.
«Замин»ни Telegram’да ўқинг!
