Ўзбекистонда транспорт инфратузилмасини ҳимоя қилиш ва йўл ҳаракати хавфсизлигини ошириш мақсадида оғир юк машиналари учун махсус давлат рақамлари жорий этилади. Сўнгги йилларда мамлакатда юк автомобиллари сони кескин ортиб, охирги 15 йил ичида қарийб уч баравар кўпайган. Бу эса йўлларга босимни кучайтиради, уларнинг тезроқ эскиришини ва йўл-транспорт ҳодисаларининг сонининг кўпайишини келтириб чиқармоқда.
2026 йил 1 январдан бошлаб, ялпи оғирлиги 44 тоннадан юқори бўлган юк транспорти воситалари ҳамда карьерларда фойдаланиладиган йирик самосваллар учун алоҳида давлат рақамлари жорий қилинади. Янги рақамлар қизил фонли бўлиб, оқ ҳарф ва рақамлардан иборат “YUK” сериясида тақдим этилади. Уларнинг чап томонида ҳудуд коди, ўнг томонида эса давлат байроғи ва “UZ” белгиси акс этади.
Мутахассислар таъкидлашича, бу тизим қатор афзалликларга эга:
Йўл инспекторлари энг оғир транспорт воситаларини тезда ажратиб олиш имкониятига эга бўлади;
Йўлларнинг ҳаддан ташқари юкланиши олди олинади ва уларнинг тез эскириши камаяди;
Транспорт оқими ва тирбандлик тартибга солинади;
Йўлларда бахтсиз ҳодисалар сони қисқаради ва хавфсизлик ошади.
Шунингдек, юк машиналарини тунги вақтда йўл четида қолдирганлик учун жазони кучайтириш ҳам таклиф қилинмоқда. Статистикага кўра, фақат 2024 йилда шундай ҳолатлар сабабли 113 та ЙТҲ содир бўлган ва 47 киши ҳаётдан кўз юмган.
Янги тизим нафақат йўл инфратузилмаси хавфсизлигини таъминлайди, балки оғир транспорт воситалари ва уларни бошқарувчи шахслар устидан аниқ ҳисоб юритишни ҳам осонлаштиради, шу билан транспорт назорати ва хавфсизликни янада кучайтиради.
“Zamin”ни Telegram'да ўқинг!
