Kept консалтинг компаниясининг 2025 йил октябрда эълон қилинган “ақлли шаҳарлар” рейтинг натижаларига кўра, Тошкент “ривожланиш салоҳиятига эга” шаҳарлар гуруҳига киритилди, деб UPL.uz хабар берди. Рейтингда МДҲ ва БРИКС+ давлатларининг 15 шаҳри қамраб олинган.
Тошкент 50 баллдан кам натижа қайд этиб, рейтингнинг ўрта тоифасига кира олмади. Энг заиф натижа “ақлли бизнес ва бандлик” йўналишида кузатилди — 40,4 балл билан 14-ўрин. Сабаб сифатида рақамли хизматларнинг етарли эмаслиги кўрсатилган.
Экологик барқарорлик соҳасида ҳам муаммолар бор — ҳар бир аҳолига 3 кв.м яшил майдон тўғри келади ва шаҳар майдонининг фақат 2% қисми кўкаламзорлаштирилган. Шунингдек, ҳаво ифлосланиши индекси 101−150 оралиғида туриши қайд этилган.
Шаҳар транспортидаги тиқинлар кўп вақт талаб қилмоқда — кўрсаткич 10,7 деб баҳоланган. Шунингдек, очиқ маълумотлар портали йўқ ва шаҳар бошқаруви бўйича маълумотлар кам янгиланади.
Шу билан бирга, Тошкент электромобиллар тарқалиши бўйича МДҲда етакчи, “ақлли ёритиш” ва “ақлли счётчиклар” тизимлари жорий этилган. Туризм ва меҳмонхона инфратузилмаси йўналишида ҳам ижобий ўзгаришлар қайд этилган.
“Zamin”ни Telegram'да ўқинг!
