Қамчиқ довонида замонавий туризм ҳудуди қурилади

Наманган вилоятининг Қамчиқ довони ҳудудида замонавий канатли йўл ва дам олиш мажмуаси қурилади, деб Курсив медиа ёзмоқда.

Маълум қилинишича, мазкур лойиҳа 90 гектар майдонни қамраб олади. Қурилиш ишларини Doppelmayr/Garaventa Group компанияси амалга оширади.

13 октябрь куни Наманган вилояти ҳокими Шавкатжон Абдураззоқов ушбу компания вакиллари — Ёханнес Триебник, Валерий Яшин ва Евгений Куприн билан учрашди. Томонлар лойиҳа доирасида барпо этиладиган объектлар ва ҳамкорлик йўналишларини муҳокама қилишди.

Лойиҳани Наманганлик тадбиркор Жобирхон Камалитдинов раҳбарлик қилаётган Aisha Group компанияси молиялаштирмоқда.

Маълумот учун, Doppelmayr/Garaventa Group — Австрия ва Швейсарияда жойлашган, канатли йўллар, гондолалар, лифтлар ҳамда ташиш тизимларини ишлаб чиқарувчи йирик компаниялар гуруҳи ҳисобланади. У 96 мамлакатда 15 мингдан ортиқ лойиҳа амалга оширган.

Нодирбек Раззоков

«ZAMIN.UZ» муҳаррири