Ўзбекистонда “яшил ташаббуслар” учун йилига 10 млрд сўм ажратилади

Ёшлар ишлари агентлиги ҳузурида Яшил ташаббусларни қўллаб-қувватлаш жамғармаси тузилди, деб Podrobno.uz хабар берди. Унинг фаолияти учун ҳар йили 10 миллиард сўмгача маблағ ажратилади.

Жамғарма маблағлари табиатни муҳофаза қилиш, чиқиндиларни қайта ишлаш, қайта тикланувчи энергия манбаларини ривожлантириш, экологик тоза технологияларни жорий этиш, ҳудудларни кўкаламзорлаштириш, ўрмонларни тиклаш ва экотуризмни ривожлантиришга йўналтирилади.

Агентлик маълумотига кўра, ёшлар ўз ғояларини амалга ошириш — иқлим ўзгаришига қарши кураш, эковидеороликлар, медиаплатформалар, энергия истеъмолини камайтиришга қаратилган мобил иловалар яратишда молиявий ёрдам олиш имконига эга бўлади.

Шунингдек, ёшларни экологик муаммоларни ҳал этишга жалб қилиш ва атроф-муҳитга эҳтиёткор муносабат маданиятини шакллантириш мақсадида энергия тежамкорлиги бўйича танлов ва акциялар ўтказиш режалаштирилмоқда.

Нодирбек Раззоков

«ZAMIN.UZ» муҳаррири