Математика фанидан бўлиб ўтган туман (шаҳар) босқичи олимпиадаси юзасидан кутилмаган ҳолат қайд этилди. Ижтимоий тармоқларда олимпиада саволлари мусобақа бошланишидан олдин тарқалиб кетгани ҳақида маълумотлар пайдо бўлди. Бу ҳолат жамоатчилик орасида катта муҳокамага сабаб бўлди, деб хабар берди Ихтисослаштирилган таълим муассасалари агентлиги.
Маълум қилинишича, мазкур саволлар Фан олимпиадалари маркази томонидан махсус ишчи гуруҳлар иштирокида тузилган ва ҳар бир ҳудудда марказлашган ҳолда чоп этилган. Бироқ айрим ҳудудларда саволларни чоп этиш жараёнида масъул шахслар томонидан тартиб бузилиб, материаллар ноқонуний йўл билан ташқариги чиқиб кетган.
Агентликнинг расмий маълумотига кўра, айрим ходимлар саволлардан намуна олиб, уларни ижтимоий тармоқлар ёки мессенжерлар орқали тарқатган. Бу ҳолат синов натижаларига таъсир кўрсатиши мумкинлиги сабабли, математика фанидан олимпиаданинг туман (шаҳар) босқичи барча синфлар бўйича — 9-, 10- ва 11-синфларда — қайта ўтказилиши белгиланди.
“Ҳозирда бу қоидабузарликка сабабчи шахслар аниқланмоқда. Улар амалдаги қонунчилик доирасида жавобгарликка тортилади. Фан олимпиадалари маркази барча босқичларда жараёнларнинг шаффоф ва холис бўлиши тарафдори”, — дейилади агентлик баёнотида.
“Zamin”ни Telegram'да ўқинг!
