Ўзбекистонда соғлом турмуш тарзига қизиқиш йил сайин ортаётгани яна бир бор тасдиқланди. Миллий статистика қўмитаси маълумотларига кўра, 2025 йилнинг январь–август ойларида мамлакат аҳолисининг жисмоний машғулотлар билан шуғулланиш даражаси сезиларли ошган, деб хабар берди idoraviy манбалар.
Маълумотларга қараганда, жорий йилда спорт билан шуғулланувчи эркаклар улуши 71,9 фоизни ташкил этган. Бу кўрсаткич 2024 йилга нисбатан 0,2 фоизга юқори. Аёллар ўртасида ҳам ижобий динамика кузатилмоқда — уларнинг 64,1 фоизи жисмоний машғулотлар билан мунтазам шуғулланишни одат қилган.
Қўмита маълумотлари шуни кўрсатадики, сўнгги беш йил ичида фаол аҳоли улуши изчил ўсиб бормоқда.
Эркаклар кесимидаги статистика қуйидагича:
2021 йил — 66%
2022 йил — 67,3%
2023 йил — 68,8%
2024 йил — 71,7%
2025 йил — 71,9%
Аёллар орасидаги кўрсаткичлар ҳам барқарор ўсишни намоён этмоқда:
2021 йил — 55,7%
2022 йил — 57,3%
2023 йил — 58,5%
2024 йил — 63,7%
2025 йил — 64,1%
Мутасаддиларнинг фикрича, бу ўсиш нафақат соғлом турмуш тарзини тарғиб қилиш ишлари самараси, балки ҳудудларда янги спорт инфратузилмалари барпо этилаётгани билан ҳам боғлиқ. Охирги йилларда деярли ҳар бир туманда спорт майдонлари, фитнес марказлари ва очиқ ҳаводаги тренажёрлар сони кўпайди.
“Zamin”ни Telegram'да ўқинг!
