Ўзбекистонда банк тизимидаги назорат натижаларига кўра бир нечта молиявий ташкилотларга нисбатан чора кўрилди, деб хабар берди centralbank.uz.
Марказий банк ҳузуридаги Банк назорати қўмитаси сентябрь ойидаги йиғилишида 43 та масала кўриб чиқиб, тегишли қарорлар қабул қилди. Уларнинг катта қисми рўйхатга олиш, рухсат бериш ва банк фаолиятини баҳолашга оид бўлди.
Текширувлар чоғида айрим банк ва тўлов ташкилотларининг пруденциал талаблар ҳамда қонунчилик нормаларига тўлиқ риоя этмагани аниқланди.
Натижада 7 та банк ва 13 та тўлов ташкилотига расмий огоҳлантириш берилди — уларга камчиликларни қисқа муддатда бартараф этиш вазифаси қўйилди.
Шу билан бирга, 8 та банк жиноий даромадларни легаллаштириш ва терроризмни молиялаштиришга қарши курашиш қоидаларини бузгани, шунингдек, мижозларга хизмат кўрсатиш жараёнида қонун талабларига амал қилмагани учун жаримага тортилди.
Марказий банк таъкидлашича, бундай чоралар банк тизимидаги шаффофликни кучайтириш ва фуқаролар ишончини мустаҳкамлашга қаратилган. Муттахассислар фикрича, бу қарор молия бозорида интизомни оширишга хизмат қилади.
