21 октябрь куни кечаси Афғонистон ҳудудида содир бўлган зилзила Ўзбекистоннинг бир нечта вилоятларида ҳам ҳис қилинди. Бу ҳақда Сейсмопрогностик мониторинг Республика маркази маълум қилди.
Маълумотларга кўра, зилзила Тошкент вақти билан соат 23:14 да қайд этилган. Унинг эпицентри Бадахшон вилоятида, Тошкентдан тахминан 556 километр жанубий-шарқда жойлашган. Зилзиланинг магнитудаси 6 балл, чуқурлиги эса 225 километр бўлган.
Ўзбекистон ҳудудидаги сейсмик фаоллик асосан енгил даражада сезилган. Хусусан, Сурхондарё вилоятида тебраниш кучи 3 балл атрофида қайд этилган. Фарғона, Сирдарё, Андижон, Жиззах, Самарқанд, Наманган ва Қашқадарё вилоятларида 2–3 балллик сейсмик таъсир кузатилган. Пойтахт Тошкентда эса ер ости тебранишлари 2 балл даражасида бўлган.
Ҳозирча зилзила оқибатида қурбонлар ёки зарарлар ҳақида маълумот берилмаган. Мутахассислар Афғонистон шимолидаги фаол тектоник ҳудудларда сўнгги ойларда зилзилалар сони кўпайганини қайд этмоқда.
Экспертлар фуқароларни шошма-шошар ҳаракат қилмасликка ва расмий манбалар орқали маълумотларни кузатиб боришга чақирди.
“Zamin”ни Telegram'да ўқинг!
