Иситиш мавсумида аҳолининг эҳтиёжманд қатламига моддий ёрдам кўрсатиш учун 1,2 триллион сўм ажратилади, деб хабар берди [Ижтимоий ҳимоя миллий агентлиги].
Президент қарорига мувофиқ, бу йил ижтимоий қўллаб-қувватлаш дастурига 1,1 миллиондан зиёд оила киритилди. Улардан 822 мингтаси аввалдан ижтимоий реестрда бўлган, яна 290 мингга яқини “Маҳалла еттилиги” орқали қўшимча аниқланган.
Қўшимча рўйхатга боқувчисини йўқотганлар, ногиронлиги бўлган аъзоси бор оилалар, оғир касалликка чалинганлар, ёлғиз кексалар ва газ тармоғига уланмаган оилалар ҳам киритилган. Шунингдек, меҳнат миграциясидаги боқувчиси бор ёки вақтинча ишсиз шахслар яшайдиган хонадонлар ҳам ёрдам олади.
Маълумотларга кўра, ўтган йили 120 минг оилага 270 минг сўмдан моддий ёрдам берилган бўлса, бу йил ажратиладиган маблағ миқдори 2,5 баробарга оширилган.
Дастур доирасида ажратиладиган 1,2 триллион сўм давлат бюджети ҳисобидан қопланади. Мутахассислар бу ташаббус иситиш мавсумида ижтимоий ҳимояга муҳтож қатламлар учун катта енгиллик яратишини таъкидламоқда.
“Zamin”ни Telegram'да ўқинг!
