Ўзбекистонда келаси йил 1 январдан давлат ижтимоий суғуртасининг янгича тизими ишга тушади, деб хабар берди Адлия вазирлиги.
Президентнинг ПФ–206-сонли фармонига мувофиқ, янги тартиб фуқароларга ижтимоий ҳимоя хизматларини қулай ва тезкор тарзда олиш имконини яратади.
Янги тизимга кўра, фуқаролар суғурта дастурига икки усулда қўшила олади — мажбурий ёки ихтиёрий равишда. Мажбурий суғурта жисмоний шахслар даромад солиғининг маълум қисми ҳисобидан амалга оширилади. Ихтиёрий суғуртага қўшилмоқчи бўлганлар эса ҳар ой энг кам иш ҳақининг 5 фоизи миқдорида бадал тўлайдилар.
Суғурта тўловлари миқдори фуқароларнинг тўлов стажи ва тўланган маблағ ҳажмига қараб белгиланади.
Янги тизимнинг яна бир муҳим жиҳати — айрим нафақаларни автоматик равишда тайинлаш имкониятидир. 2026 йил 1 январдан ҳомиладорлик ва туғруқ нафақаси, шу йил 1 июлдан вақтинчалик меҳнатга лаёқатсизлик нафақаси ҳужжат талаб қилинмасдан жамғарма томонидан проактив равишда тўланади.
2030 йилдан бошлаб ишдан бўшатилганлик нафақаси ҳам шу усулда тайинланиши режалаштирилган.
Таклифларга кўра, нафақа миқдори иш стажига боғлиқ бўлади: 8 йилгача стажга эга бўлганларга иш ҳақининг 60 фоизи, 8 йилдан ортиқ стажга эгаларига эса 80 фоизи тўланади. Шунингдек, 4 ёки ундан кўп фарзанди бор, ёки ногирон фарзанд парваришлаётган оилалар учун нафақа яна 20 фоизга кўпайтирилади.
“Zamin”ни Telegram'да ўқинг!
