Соғлиқни сақлаш вазирлиги маълум қилишича, 2026 йилдан бошлаб Ўзбекистонда шошилинч тиббий ёрдам тизимида “Онлайн шифокор” хизмати йўлга қўйилади.
Янги платформа орқали фуқаролар фавқулодда вазиятларда масофадан туриб шифокор маслаҳатини олиш имконига эга бўлади. Бу тизим шошилинч ёрдам марказлари, шифохоналар ва поликлиникалар ўртасидаги боғланишни кучайтиради ҳамда тиббий қарорларни тезроқ қабул қилишга ёрдам беради.
Лойиҳа соғлиқни сақлаш соҳасини рақамлаштириш дастури доирасида амалга оширилмоқда. Вазирлик маълумотларига кўра, сўнгги йилларда тизим самарадорлиги сезиларли даражада ошган.
Бугунгача 2400 нафар диспетчер махсус тайёргарликдан ўтди. Бунинг натижасида тез ёрдам манзилга етиб боришдаги кечикишлар 1,1 фоиздан 0,3 фоизгача қисқарган. Энг муҳими, қўнғироқларга жавоб бериш вақти 25–30 дақиқадан 10–15 дақиқагача камайган.
Сўнгги саккиз йилда шошилинч ёрдам пунктлари сони 818 тадан 1600 тагача, бригадалар сони эса 2800 тагача ошди. Шу билан бирга, ҳар бир чақириқ учун дори воситаларига сарфланадиган маблағ 750 сўмдан 11 800 сўмгача кўтарилган.
Мутасаддиларнинг таъкидлашича, “Онлайн шифокор” хизмати тиббий ёрдамнинг самарадорлигини янада ошириб, инсон ҳаётини сақлаб қолиш имкониятини кенгайтиради.
“Zamin”ни Telegram'да ўқинг!
