Ўзбекистонда мактабгача таълим соҳасида ўсиш қайд этилмоқда, деб хабар берди Миллий статистика қўмитаси.
2024 йил якуни бўйича мамлакатда фаолият юритаётган мактабгача таълим муассасалари сони 38 058 тага етди. Бу 2023 йилга нисбатан 2 мингдан зиёд кўрсаткич бўлиб, тизимдаги кенгайиш суръати ортиб бораётганини кўрсатади.
Маълумотларга кўра, боғчаларнинг асосий қисмини — 28 700 дан ортиғини оилавий нодавлат муассасалар ташкил этади. Сўнгги йилларда хусусий секторни қўллаб-қувватлаш ва лицензиялаш жараёнларининг соддалашуви бу йўналишда фаол ривожланишга туртки бўлди.
Энг кўп боғчалар Самарқанд (4 507 та), Андижон (4 324 та), Қашқадарё (4 216 та) ва Фарғона (4 189 та) вилоятларига тўғри келмоқда. Тошкент шаҳри (1 047 та) ва Сирдарё вилояти (1 145 та) эса энг паст кўрсаткичга эга ҳудудлар сифатида қайд этилган.
Мутахассислар таъкидлашича, боғчалар сонининг ортиши болаларнинг эрта ривожланиши ва таълим сифатига ижобий таъсир кўрсатмоқда. Шу билан бирга, тарбиячилар малакасини ошириш ва сифат назоратини кучайтириш ҳануз муҳим вазифа бўлиб қолмоқда.
“Zamin”ни Telegram'да ўқинг!
