Ўзбекистонда гиёҳвандликка қарши курашда янги тизим жорий этилади. Энди наркотик воситаларнинг ноқонуний айланмаси ҳақида хабар берган ёки уни аниқлашга ёрдам кўрсатган фуқаролар махсус мукофот билан тақдирланади, деб хабар берди ҳукумат манбалари.
Президент фармонига мувофиқ, рағбатлантириш тартибини Наркотиклар ва ўқотар қуролларни назорат қилиш агентлиги ишлаб чиқади ва Вазирлар Маҳкамасига тақдим этади. Бу чора фуқароларнинг фаол иштироки орқали гиёҳвандликка қарши курашни кучайтиришни мақсад қилади.
Шунингдек, Ички ишлар вазирлиги 2025 йил охиригача профилактика инспекторларини ноқонуний нарколаборатория ва қадоқлаш цехларини аниқлаш бўйича тайёрлашни ташкил этади. Самарали ишлаган ходимлар бюджетдан ташқари маблағлар ҳисобидан рағбатлантирилади.
2026 йил 1 мартгача ички ишлар органлари учун наркотик воситаларни тезкор аниқлайдиган замонавий ускуналар харид қилиниши режалаштирилган.
Бундан ташқари, психотроп ва кучли таъсир этувчи моддалар айланмасига қарши чоралар кучайтирилади. Ёшлар иштирокидаги жиноятлар учун эса алоҳида қатъий жавобгарлик белгиланиши кутилмоқда.
Янги ташаббус нафақат жиноятчиликка қарши курашиш, балки жамиятнинг онгли иштирокини таъминлашга ҳам қаратилган.
“Zamin”ни Telegram'да ўқинг!
