Тошкент ҳавоси дунё бўйича энг ифлос шаҳарлар қаторидан 2-ўринга чиқди

10 ноябрь куни Тошкент шаҳри ҳаво ифлосланиши бўйича дунёда иккинчи ўринни эгаллади, деб хабар берди IQAir.

Маълумотларга кўра, соат 16:51 да пойтахт ҳавосидаги PM 2.5 туридаги зарарли зарралар концентрацияси 121,6 мкг/м³ ни ташкил этган. Бу кўрсаткич Жаҳон соғлиқни сақлаш ташкилоти тавсия этган меъёрдан 24 баравар юқори ҳисобланади.

Мутасаддилар аҳолига зарурат бўлмаса кўчага чиқмаслик, нафас олиш тизими билан боғлиқ касалликлари борлар эса тиббий ниқобларда юришни тавсия қилмоқда.

Шунингдек, уйга қайтгандан кейин юз ва қўлларни ювиш, хоналарда чанг тўпланишига йўл қўймаслик, эшик ва деразаларни ёпиқ тутиш ҳамда нам латта билан тозалаш тавсия этилади.

Метеорологлар таъкидлашича, бугунги вазият пойтахтдаги экология муаммоларининг кескинлашганидан дарак бермоқда.

Kamola Shuhratova

«ZAMIN.UZ» муҳаррири