Ўзбекистоннинг расмий олтин-валюта захиралари сўнгги йилларда кузатилмаган даражада ўсди. Марказий банк маълумотларига кўра, 2025 йил 1 ноябрь ҳолатида мамлакатнинг халқаро захиралари 59,3 миллиард долларга етган, деб хабар берди Spot.uz. Бу кўрсаткич мамлакат тарихидаги энг юқори натижа сифатида қайд этилди.
Марказий банк ҳисоботида таъкидланишича, захиралар бир ой ичида 4,3 миллиард долларга ошган. Бу ўсиш, асосан, жаҳон бозорида олтин нархларининг йил бошидан буён қарийб 50 фоизга кўтарилгани билан боғлиқ.
Октябрь ойида валюталар ҳисоби 731 миллион долларга ошган бўлса, олтин захиралари қиймати 3,6 миллиард долларга кўпайиб, 47,8 миллиард долларга етган. Шунингдек, олтиннинг жисмоний ҳажми ҳам ортиб, 11,6 миллион троя унциядан 11,9 миллион унциягача кўтарилган.
Марказий банк балансидаги қимматли қоғозлар портфели ҳам бироз ўсиб, 1 миллиард 23 миллион долларни ташкил этгани қайд этилган.
Мутахассислар олтин нархларидаги кескин ўсишни жаҳон бозорларидаги беқарорлик, геосиёсий зиддиятлар ва АҚШ Федерал резерв тизимининг сиёсий ўзгаришлари билан изоҳламоқда.
Иқтисодчилар таъкидлашича, бу ҳолат Ўзбекистоннинг молиявий барқарорлигини мустаҳкамлаш ва ташқи шокларга қарши туриш имконини янада кучайтириши мумкин.
“Zamin”ни Telegram'да ўқинг!
