Кейинги йилдан мамлакатга келадиган хорижлик сайёҳлар учун бир қатор замонавий қулайликлар жорий этилади. Президент томонидан 20 ноябрь куни имзолаган қарорга кўра, 2026 йил 1 июлдан бошлаб туристлар чегарадан ўтар экан, уларнинг розилиги билан маълумотлар интеграция қилинади ва махсус туристик электрон SIM-карта автоматик тарзда тақдим этилади. Шу билан бирга, меҳмонларни вақтинча рўйхатдан ўтказиш ҳам проактив шаклда амалга оширилади.
Янги миллий туризм платформаси ва унинг мобил иловаси орқали бир қатор кенг имкониятлар очилади. Эндиликда транспортнинг барча турлари ягона тизимга боғланади, сайёҳлар энг мақбул йўналишни танлаб, чипталарни онлайн резервация қилиш имконига эга бўлади.
Шунингдек, музейлар, маданий мерос объектлари ва дам олиш масканларига электрон билет сотиб олишга мўлжалланган ягона чипта тизими ишга туширилади. Экскурсиялар учун интерактив хариталар, аудио ва видео йўлдошлар, инчунин онлайн трансляциялар орқали маълумот бериш имконини яратувчи рақамли гид тизими ишлай бошлайди.
Туристик йиғимларни меҳмонхоналар автоматик тарзда биллинг орқали Жамғармага ўтказади. Шу билан бирга, аҳоли томонидан дала ҳовлиларини ижарага бериш жараёни ҳам соддалаштирилиб, “Soliq” иловасида “мен билан бирга” тартибида расмийлаштирилади.
2026 йил якунига қадар “Хавфсиз шаҳар” тизими билан интеграция қилинган ҳолда, туристлар оқими, уларнинг қизиқишлари ва ҳаракатланишини таҳлил қиладиган сунъий интеллект платформаси ишга туширилади. Бу орқали индивидуал маршрутлар, динамик таклифлар ва нарх шаклланиши янада қулай тарзда бошқарилади.
Хулоса қилиб айтганда, янги рақамли тизимлар Ўзбекистон туризмига янги босқич очиши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
