Ўзбекистон олий таълим тизими учун янги эшиклар очилиши мумкин. Мамлакат “Олий таълим соҳасида малакаларни ўзаро тан олиш тўғрисидаги глобал конвенция”ни ратификация қилгач, Ўзбекистонда берилган дипломлар жаҳоннинг 38 та мамлакатида расман эътироф этилиши эҳтимол қилинмоқда.
Бу ҳужжат Президент томонидан 11 ноябрда имзоланди ва UNESCO шафелигида тайёрланган глобал аҳамиятга эга биринчи шартнома сифатида катта ўрин тутади. Конвенцияга кўра, аъзо давлатлар бир-бирининг диплом ва малакаларини адолатли тарзда тан олиши шарт. Фақат таълим стандартлари кескин фарқ қилгандагина рад этиш мумкин.
Ҳозирги кунда шартнома иштирокчилари 38 та мамлакатдан иборат — Европада Франция, Буюк Британия, Швеция ва бошқалар; Осиёда Япония, Жанубий Корея; Африкада ЖАР, Сенегал; Америкада Уругвай, Эквадор; шунингдек, Австралия ва Янги Зеландия каби давлатлар бор.
Энг қизиғи — Ўзбекистон Марказий Осиёда ушбу Конвенцияга қўшилган илк давлат бўлмоқда. Ратификация ҳақидаги ҳужжат UNESCOга топширилганидан кейин 3 ой ўтиши билан Ўзбекистон тўлаҳуқуқли аъзо мақомини олади.
Шу билан бирга, хорижда олинган дипломларни Ўзбекистонда тан олиш масаласи ҳам ўз алоҳида тартибига эга. Бу жараён “Таълим тўғрисида”ги қонун ва Вазирлар Маҳкамасининг 620-сон қарори билан белгиланган. Айрим ҳолларда халқаро шартномалар асосида дипломлар қўшимча имтиҳонларсиз ҳам тўғридан-тўғри тан олиниши мумкин.
Ўзбек талаби, ўқитувчиси ва мутахассиси учун бу катта қадам — имконият кенгаяди, дунёга чиқиш учун дадилроқ платформа пайдо бўлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
