Тошкент жамоат транспортида жиддий ўзгаришлар бошланмоқда — пойтахтда автобусlarning ўртача ҳаракат тезлиги сезиларли оширилади. Президент қарорига кўра, эндиликда автобуслар 18 км/соат ўрнига 24 км/соат тезликда ҳаракатланиши белгиланмоқда. Бу нафақат вақтни тежаш, балки йўллардаги тирбандликларни камайтиришга қаратилган ислоҳотларнинг бир қисми саналади.
Тасдиқланган йўл харитасига мувофиқ, 2030 йилгача Тошкент транспорт тизимида бир қатор катта мақсадлар қўйилган. Жумладан, аҳолининг жамоат транспортидан фойдаланиш даражасини 60 фоизга етказиш, пойтахт бўйлаб 150 минг ўринли автотураргоҳлар барпо этиш ва метро тармоғини 103 километргача кенгайтириш режалаштирилган.
Шунингдек, Тошкентда Йўл ҳаракатини ташкил этиш маркази ташкил этилади. У транспорт оқимлари, пиёдалар ҳаракати ва жамоат транспортини замонавий рақамли технологиялар асосида доимий мониторинг қилиб боради.
Марказнинг вазифалари орасида яна қуйидагилар бор:
— пойтахтнинг тўлақонли транспорт мастер-режасини ишлаб чиқиш;
— шаҳарга кирувчи асосий йўлларда автобус ва метрони боғловчи кўп қаватли парковкалар қуриш;
— ерусти метро линиялари ва йўлўтказгичлар остида хавфсиз автотураргоҳлар барпо этиш.
Ушбу ўзгаришлар Тошкент йўлларида ҳаракатни енгиллаштириши, жамоат транспортини барқарор ва тезкор қилишини мутасаддилар таъкидлаяпти. Шаҳар транспорт тизими яқин йилларда мутлақо янги босқичга кўтарилиши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
