19 декабрь куни соат 10:39да Афғонистоннинг Тахор вилояти ҳудудида 6 балл кучига эга зилзила қайд этилди. Ер силкинишининг эпицентри Тошкентдан тахминан 551 километр жанубий-шарқда жойлашган.
Ўзбекистон Сейсмопрогностик мониторинг маркази маълумотига кўра, зилзила мамлакатнинг бир қатор ҳудудларида турли даражада сезилган. Энг кучли тебраниш Сурхандарё вилоятида кузатилиб, у ерда 4 баллга етган. Қашқадарё ва Самарқанд вилоятларида ер силкиниши 3 балл атрофида бўлган.
Жиззах, Сирдарё ва Фарғона вилоятларида зилзила 2–3 балл даражасида сезилган. Навоий вилояти, Тошкент шаҳри, шунингдек Наманган ва Андижон вилоятларида эса 2 балллик ер тебранишлари қайд этилган.
Айни пайтгача фуқаролар ҳаёти ёки инфратузилмага жиддий зарар етгани ҳақида расмий маълумот берилмади. Вазирлик ва тегишли хизматлар вазиятни назорат остида ушлаб турибди. Ер силкинишлари хавфи сақланиб турган бир пайтда, мутахассислар аҳолини хотиржамликни сақлашга ва хавфсизлик қоидаларига амал қилишга чақирмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
