Янги йилнинг илк иш ҳафтасида Ўзбекистон ҳудудларида асосан қуруқ ва барқарор об-ҳаво кузатилиши кутилмоқда. «Ўзгидромет» маълумотларига кўра, мамлакат бўйлаб ёғингарчилик бўлмайди, айрим жойларда эса туман тушиши мумкин.
Ҳаво ҳарорати кечалари 0…–5 даража атрофида бўлиб, шимолий ҳудудларда –6…–8 даражагача пасайиши эҳтимолдан холи эмас. Кундуз кунлари эса 5–8 январда ҳаво +6…+9 даража, 9 январ куни эса +9…+12 даража илиқ бўлиши кутилмоқда.
Айрим ҳудудларда, айниқса эрталабки соатларда туман кузатилиши мумкин. Шамол асосан шарқдан эсиб, кучсиздан ўртача тезликкача бўлади.
Тошкент шаҳрида ҳам ҳафта давомида ёғингарчилик кутилмайди. Кечаси ва эрталаб туман тушиши эҳтимоли бор. Шамол шарқдан 3–8 м/с тезликда эсади. Ҳарорат кечалари 0…–2 даража, кундуз кунлари 5–8 январда +7…+9 даража, 9 январ куни эса +10…+12 даража илиқ бўлади.
Умуман олганда, ҳафта давомида кескин об-ҳаво ўзгаришлари кузатилмайди, кунлар эса нисбатан илиқ ва қулай кечиши кутилмоқда.
